Monday, May 6, 2013

ထိုင်းဘုရင်မင်းမြတ်အား ကရင်တိုင်းရင်းသား နှစ်ထောင် ကျော် တက်ရောက်ဂါရ၀ပြု

ထိုင်းနိုင်ငံ၊ ဘန်ကောက်မြို့ ဖလာ့မလွန်စွန်း မားနေရာတွင် ယမန်နေ့ မေလ ၅ရက်နေ့က ပြုလုပ်သော ဒုတိယအကြိမ် ထိုင်း ဘုရင်မင်းမြတ် ဘူမိဘောအဒူရာဒက်အား ဂုဏ်ပြုသည့် ရိုသေဂါရ၀ပြုပွဲ အခမ်းအနားသို့ ကရင်တိုင်းရင်းသား ၂ ထောင်ကျော် တက်ရောက်ဂါရ၀ပြုခဲ့သည်ဟု သိရသည်။

၎င်းဂါရ၀ပြုပွဲတွင် ထိုင်းနိုင်ငံရှိ တိုင်းရင်းသားများဖြစ်သည့် ကရင် အပါအ၀င် ကချင်၊ ကရင်နီ၊ လားဟူနှင့် ရှမ်း စသည့် တိုင်းရင်းသား ငါးထောင်ကျော်တက်ရောက်ခဲ့ရာ ကရင်လူမျိုး အများဆုံး တက်ရောက်ခဲ့ခြင်းဖြစ်သည်ဟု ပွဲဖြစ်မြောက်ရေး ကော်မတီ၏ မှတ်တမ်းများအရ သိရသည်။

“အခမ်းအနားမှာ တနိုင်ငံလုံး အတိုင်းအတာအရ ထိုင်းလူမျိုးနဲ့ တိုင်းရင်းသားပေါင်းစုံတွေ သောင်းဂဏန်း တက်ရောက် ကြတယ်။ ထိုင်းနိုင်ငံရောက် တိုင်းရင်းသားနဲ့ ဌာနေတိုင်းရင်းသား စုစုပေါင်း အဖွဲ့ ၄၀ထဲမှာ ကရင်တိုင်းရင်းသားတွေက အများဆုံး တက် ရောက်တယ်လို့ ဖြစ်မြောက်ရေးကော်မတီဝင်က ကျနော့်ကို ပြောပြတယ်”ဟု အခမ်းအနား တက်ရောက်ခဲ့သူ OKRSO မှ ကရင် စာပေနှင့် ယဉ်ကျေးမှု ဖော်ထုတ်ထိန်းသိမ်းမြှင့်တင်ရေးကော်မတီ ဥက္ကဌ စောစိပ် ပလောင်က တဆင့် ပြောဆိုသည်။

ဂါရ၀ပြုပွဲတွင် ဘုရင်မင်းမြတ်အား ထိုင်းလူမျိုးများအပြင် တိုင်းရင်းသားများလည်း တီးမှုတ်ဆိုကခြင်းများဖြင့် ဖျော်ဖြေခဲ့ ကြပြီး ကရင်တိုင်းရင်းသားများကိုယ်စား ဘန်ကောက်အခြေစိုက် ကရင်ဒုက္ခသည်များဆိုင်ရာ လူမှုစောင့်ရှောက်ရေး အဖွဲ့ (OKRSO)မှ ယဉ်ကျေးမှုအဖွဲ့က ဒုံးယိမ်းအကဖြင့် ဖျော်ဖြေတင်ဆက်ခဲ့ကြသည်။

စောစိပ်ပလောင်က “ဒီပွဲမှာ ဘုရင်ကို ဂုဏ်ပြုတယ်ဆိုပေမယ့် ဘုရင်ကိုယ်တိုင် မတက်ရောက်နိုင်ခဲ့ပါဘူး။ ဒါပေမယ့် သူ့သားကတော့ တက်ရောက်ခဲ့တယ်။ ဘယ်လိုပဲဖြစ်ဖြစ် ဒီလိုပွဲမျိုးမှာ ကရင်တွေအနေနဲ့ ရိုးရာယဉ်ကျေးမှုတွေကိုတင်ဆက် ခွင့်ရတာ ၀မ်းသာပါတယ်”ဟု ကေအိုင်စီသို့ ပြောသည်။

ထိုင်းဘုရင်မင်းမြတ်အား ရိုသေဂါရ၀ပြုသည့်ပွဲတွင် (OKRSO)အဖွဲ့မှ ဒုံးယိမ်းအဖွဲ့ ၃ဖွဲ့နှင့်အတူ ကရင်လူမျိုးတို့၏ ယဉ်ကျေးမှုများ ဖြစ်သည့် မယ်ဒလင်သီချင်းများ၊ ဗျပ်စောင်း(နားဒိန်)တီးခတ်မှုများဖြင့် ဖျော်ဖြေခွင့်ရခဲ့ကြောင်းလည်း စောစိပ် ပလောင်က ဆက် ပြောသည်။

ထိုပွဲတွင် ဗျပ်စောင်းတီးခတ်ဖျော်ဖြေခဲ့သူ (OKRSO)မှ နန်းကရိမူးက “ညီမအနေနဲ့ အခုလိုပွဲမျိုးမှာ ကရင်လူမျိုး တစ်ယောက်အနေနဲ့ ပါဝင်ခွင့်ရတာ ဂုဏ်လည်းယူပါတယ်။ ကိုယ့်ကိုလည်း အသိအမှတ်ပြုတော့ ပိုပြီးတော့ ၀မ်းသာပါ တယ်။ နောက်နှစ်တွေမှာ လည်း အခွင့်အရေးရှိရင် ဆက်ပြီး ပါဝင်ချင်သေးတယ်”ဟု ကေအိုင်စီသို့ ပြောသည်။

လက်ရှိ သက်ရှိထင်ရှားဖြစ်သော ထိုင်းဘုရင်မင်းမြတ် ဘူမိဘော အဒူရာဒက်သည် ထိုင်းနိုင်ငံ၏ ၉ဆက်မြောက် ဘုရင် မင်းဆက် ဖြစ်ပြီး နန်းသက် ၆၆နှစ်နှင့် သက်တော် ၈၆နှစ်ရှိပြီး ဖြစ်သည်။

No comments:

Post a Comment