အဆိုပါ ရေလုပ်သားများနှင့် ပတ်သက်သည့် သတင်းအချက်အလက်များကို ဦးထွန်းလွင်၏ ကိုယ်ပိုင် အင်တာနက် စာမျက်နှာ တွင် ရေးသားဖော်ပြထားခြင်း ဖြစ်သည်။ပင်လယ်ထဲသို့ မျောသွားသူများသည် ကျိုက္ခမီ၊ ရေးနှင့် ကိုကိုးကျွန်းများအထိ မျောပါသွားခဲ့ကြကြောင်း၊ ယခု အချိန်အထိ လူ ပေါင်း ၁၀၀၀ ခန့်ကိုမူ ပြန်လည် ဆယ်ယူမရရှိသေးကြောင်း ၎င်း၏ သတင်း၌ ဖော်ပြထားသည်။
လေပြင်း တိုက်ခတ်မှုကြောင့် ရေလုပ်သားများ၏ လှေများ၊ ၀ါးဖောင်များသည် အနောက်တောင်ဘက်အရပ် ပင်လယ်ပြင်သို့ လွင့်မျောသွားခဲ့ပြီး ဟိုင်းကြီးကျွန်းတွင် လူ ၇၀၀ ခန့် သောင်တင်နေကြောင်းလည်း ဦးထွန်းလွင်က ဆိုသည်။
တပ်မတော် ရေယာဉ်များက ရေလုပ်သား ၆၀၀ ခန့်ကို သော်လည်းကောင်း တခြားသော ငါးဖမ်း ရေယာဉ် များက လူ ၂၀၀ ခန့်ကို သော်လည်းကောင်း ဆယ်ယူ ရရှိခဲ့ကြောင်း သိရသည်။
ပြီးခဲ့သော မတ်လ ၁၉ ရက်နှင့် ၂၀ ရက်တွင် ပင်လယ်ပြင်၌ ငါးဖမ်းနေသည့် သင်္ဘာကြီးများက ကယ်တင်၍ ကော့သောင်းမြို့သို့ ရေလုပ်သား၂၀၀ ကျော် ပို့ဆောင်ခဲ့ပြီး ယမန်နေ့ကလည်း ၂၀ ခန့် ထပ်မံ ရောက်ရှိခဲ့ကြောင်း ဒေသခံများက ပြောသည်။
ယခုအခါ ရေလုပ်သားများကို ကော့သောင်းမြို့ရှိ အောင်သုခ ရပ်ကွက် အမှတ်(၁) အထက်တန်းကျောင်းတွင် အစိုးရအာဏာ ပိုင်များက ယာယီ နေရာချပေးထားပြီး လုံခြုံရေး တင်းကျပ်ထားကြောင်း သိရသည်။
ကော့သောင်းမြို့သို့ ရောက်ရှိလာသော ရေလုပ်သားများသည် ဧရာဝတီတိုင်း အတွင်းရှိ ဖျာပုံ၊ ဒေးဒရဲ၊ လပွတ္တာ၊ မြောင်းမြ မြို့နယ်များမှ ဒေသခံများဖြစ်ပြီး အသက် ၂၀ ကျော်မှ ၅၀ ၀န်းကျင်ရှိကြောင်း ဒေသခံများက ပြောသည်။
ဒေသခံများပြောဆိုချက်အရ လာမည့် မတ်လ ၂၄ ရက်နေ့တွင် အာဏာပိုင်များက ၎င်း ရေလုပ်သားများကို ကော့သောင်း မြို့တွင် ပြေးဆွဲနေသော ခရီးသည်တင် သင်္ဘာများဖြင့် မိမိနေထိုင်ရာ ဒေသများသို့ ပြန်ပို့ရန် စီစဉ်ထားကြောင်း သိရသည်။
ရေလုပ်သားများသည် ဧရာဝတီတိုင်း မြစ်ဝကျွန်းပေါ်၌ ၀ါးဖောင်များဖြင့် ငါးဖမ်းနေစဉ် လေပြင်းမုန်တိုင်း တိုက်ခတ်မှု ဒဏ်ခံခဲ့ရပြီး ပင်လယ်ထဲ၌ မျောနေရာ ငါးဖမ်းယာဉ်များက တွေ့၍ ယခုကဲ့သို့ ကယ်တင်နိုင်ခဲ့ခြင်း ဖြစ်သည်။
ယနေ့ထုတ် မြန်မာ့အလင်း သတင်းစာ၌ ရေလုပ်သားများကို ပင်လယ်ပြင်တွင် ရှာဖွေကယ်ဆယ်ရေး လုပ်ငန်းများ ဆောင်ရွက် ခဲ့ရာ ယနေ့အထိ တပ်မတော်(ရေ) စစ် ရေယာဉ်များ၊ ပင်လယ်ပြင်အတွင်း ငါးဖမ်းရေယာဉ်များနှင့် ဒေသခံ ငါးဖမ်းစက်လှေများက ရေလုပ်သား ၃၃၇၄ ဦးကို ကယ်တင်နိုင်ခဲ့ကြောင်း၊ ၎င်း ရေလုပ်သားများ အနက် ၃၁၅၂ ဦးကို သက်ဆိုင်ရာ နေရပ်များသို့ ပို့ဆောင်ပေးခဲ့ကြောင်း၊ ကျန်ရှိနေသော ရေလုပ်သား၂၂၂ ဦးကိုမူ တာဝန်ရှိသူများက လိုအပ်သော ဆေးဝါးကုသမှုများ၊ အ၀တ် အထည်များ၊ စားသောက်ဖွယ်ရာများဖြင့် ထောက်ပံ့ကူညီ စောင့်ရှောက်ပေးထားကြောင်း ရေးသားထားသည်။
အာဏာပိုင်များက ကျန်ရှိနေသော ရေလုပ်သား ၂၀၀ ကျော်ကို မည်သည့်နေရာတွင် စောင့်ရှောက်ထားခြင်းနှင့် အသေးစိတ် ကိုမူ သတင်းစာ ၌ ဖော်ပြထားခြင်း မရှိပေ။
လေပြင်း တိုက်ခတ်မှုများကြောင့် ရန်ကုန်တိုင်းအတွင်း နေအိမ် အလုံး ၁၁၀၊ တဲ ၃၈ လုံးနှင့် ဧရာဝတီတိုင်းအတွင်း အိမ်ခြေ ၂၀ ခန့် ပြိုကျပျက်စီးသွားခဲ့ကြောင်း မတ်လ ၁၃ ရက်နေ့ထုတ် မြန်မာ့အလင်း သတင်းစာတွင် ဖော်ပြထားသည်။
မြန်မာ တနိုင်ငံလုံးတွင်လည်း လေပြင်းများ တိုက်ခတ်ခြင်း၊ မိုးထစ်ချုန်းရွာခြင်း၊ လျှပ်စီးလက်ခြင်း၊ မိုးသီးကြွေခြင်း အပါအ၀င် မိုးသက်လေပြင်းများ တိုက်ခတ်မည် ဖြစ်ကြောင်း မိုးလေ၀သနှင့် ဇလဗေဒ ညွှန်ကြားမှု ဦးစီးဌာနကလည်း မတ်လ ၁၄ ရက် နေ့က သတင်း ထုတ်ပြန်ထားသည်။
သန်းထိုက်ဦး
No comments:
Post a Comment