နအဖစစ်အစိုးရက ကျပ် (၅,ဝဝဝ) တန် ငွေစက္ကူအသစ်ထုတ်ဝေမည်ဆိုသည့် သတင်းကြောင့် စီးပွားရေး ဈေးကွက်အတွင်း ကမောက်ကမ ဖြစ်ကုန်ပြီး ရွှေဈေးကွက်လည်း ဈေးပင် မဖွင့်နိုင်တော့ကြောင်း ရွှေကုန်သည်တဦးက ပြောသည်။
၎င်းက “ဒီနေ့ ရွှေကုန်သည်များအသင်း အမှုဆောင်တွေ အားလုံး ရွှေဘုံသာလမ်းက သူတို့ ရုံးခန်းမှာ ရောက်နေကြတယ်။ ဒီနေ့ ဘယ်ဈေးပေါက်နေလဲ ဈေးမဖွင့်ပေးရဲသေးဘူး။ ဈေးကို ပုံမှန်အတိုင်း ဖွင့်ပေးလိုက်ရင် အာဏာပိုင်တွေ ရန်ရှာမှာစိုးလို့ ဘယ်သူမှ မလုပ်ရဲဘူး။ ရွှေဈေးဟာ မနေ့က ဈေးပိတ်ချိန် အကယ်ဒမီ ခေါက်ရွှေ တကျပ်သား ကျပ် (၅၇၆,ဝဝဝ) ပတ်ဝန်းကျင် ရှိတယ်။ ည (၈) နာရီသတင်းမှာ ကျပ် (၅,ဝဝဝ) တန် ထုတ်မယ်ဆိုပြီးလည်း ကြေညာလိုက်ရော တကျပ်သား ကျပ် (၆) သိန်း စဖြစ်တယ်။ ဒီနေ့ ဆိုင်ဖွင့်ချိန် ဝယ်ဈေးဟာ (၅၉ဝ,ဝဝဝ) ဖွင့်ထားပေးတယ်။ ဒါပေမယ့် ရောင်းဈေးကိုတော့ (၆) သိန်းအထက်မှာ ထားတယ်။ ရောင်းဈေး ဝယ်ဈေး အများကြီးဟနေတယ်။ ကြိုက်ရောင်းကြိုက်ဝယ်ပဲ။ အရောင်းအဝယ်က ရှိတော့ရှိတယ်။ နည်းတယ်။ အမှန်တကယ် ဒေါ်လာပေါက်ဈေးအပေါ်မှာ ချိန်ပြီးတော့ အရောင်းအဝယ် လုပ်နေကြတယ်” ဟု ပြောသည်။
အလားတူ ဒေါ်လာဈေးကွက်မှာလည်း ကြာသပတေးနေ့ ညနေ ဒေါ်လာပေါက်ဈေး တဒေါ်လာ (၁,ဝ၇၈) ကျပ် ရှိရာမှ ယနေ့ ပေါက်ဈေး (၁,၁၄ဝ) ခန့်အထိ တက်လာပြီး ရောင်းဈေးနှင့် ဝယ်ဈေးကိုမူ တဒေါ်လာ (၁၅) ကျပ်ခန့် ခွာထားကြောင်းသိရသည်။
“ချက်ချင်းဆိုသလို ဈေးတက်တာ၊ အရောင်းအ၀ယ်က လတ်တလောတော့ ရပ်သွားတယ်။ ဈေးပဲရှိတာ။ စောင့်ကြည့်နေကြတဲ့ သဘောပေါ့။ ဈေးတက်သွားတဲ့အတွက် ရောင်းမယ့်သူတွေတော့ လာတယ်၊ ၀ယ်လက်က အားနည်းသွားတယ်” ဟု မဟာဗန္ဓုလပန်းခြံလမ်းမှ ငွေအရောင်းအ၀ယ်ပွဲစားများက ပြောသည်။
ဒေါ်လာဈေး၊ ရွှေဈေးများကို ကြည့်ပါက တရက်အတွင်း (၅) မှ (၆) ရာခိုင်နှုန်း ခုန်တက်လာကြောင်း ဈေးကွက်အတွင်း စုံစမ်းသိရသည်။
အလားတူ နိုင်ငံခြားမှ မြန်မာနိုင်ငံအတွင်း ဟွန်ဒီ ငွေလွှဲလုပ်ငန်းမှာလည်း မြန်မာငွေဈေး (၆) ရာခိုင်နှုန်းခန့် ကျဆင်းသွား၍ ငွေလွှဲသူနှင့် ပြည်တွင်းမှ ငွေလက်ခံသူများ နစ်နာနေကြကြောင်း သိရသည်။
အိမ်ခြံမြေ ဈေးကွက်တွင်မူ စရန်ငွေ လက်ခံထားပြီးသူများအနေဖြင့် ဖြတ်ထားသည့်ဈေးနှုန်းအတိုင်း လက်ခံရမည် ဖြစ်သည့်အတွက် နစ်နာကြသော်လည်း နောက်ထပ် အရောင်းမရှိဘဲ ရပ်ဆိုင်းထားကြကြောင်း သိရသည်။
ယခုကဲ့သို့ ကျပ် (၅,ဝဝဝ) တန်အသစ် ထုတ်ဝေသည့်ကိစ္စနှင့်ပတ်သက်၍ ရန်ကုန်မှ စီးပွားရေးပညာရှင်တဦးက “ကျနော် သိသလောက် (၅,ဝဝဝ) တန်တွေက ရိုက်ထားပြီးတာ ကြာလှပြီ။ အခွန်ဦးစီးဌာနက မိတ်ဆွေတွေကလည်း ပြောပြကြတယ်။
ဒါပေမယ့် လွန်ခဲ့တဲ့နှစ်တွေတုန်းက သတင်းစာရှင်းလင်းပွဲတွေမှာ မေးတိုင်း အစိုးရက ငြင်းခဲ့တယ်။ သူတို့ ဒီလို ငွေစက္ကူအကြီး ထုတ်လိုက်ရင် နဂိုကတည်းကမှ အခြေအနေမကောင်းတဲ့ ဈေးကွက်ကို မထိန်းနိုင်ဘဲ ကမောက်ကမ ဖြစ်သွားမှာကို စိုးရိမ်ပုံရတယ်။ ခုတော့ အတိုင်းအတာ တခုအထိ ငွေတန်ဖိုးကို သူတို့ ထိန်းနိုင်လို့ ထုတ်တာဖြစ်မယ်” ဟု ပြောသည်။
၎င်းက ဆက်လက်၍ လက်ရှိ မြန်မာပြည်၏ တန်ဖိုးအကြီးဆုံး ငွေစက္ကူ (၁) ထောင်တန်သည် (၁) ဒေါ်လာမျှပင် တန်ဖိုးမရှိသည့်အပြင် ထိုင်းဘတ် (၅ဝ) တန်ထက်လည်း နိမ့်နေကြောင်း၊ ထို့အပြင် ဘဏ်စနစ်က ပျက်နေသည့်အပြင် ဘဏ်ကတ်များ သုံးခြင်းကလည်း လုံးဝမရှိသည့်အတွက် ငွေပေးငွေယူ ကိစ္စများတွင် ငွေစက္ကူအများကြီး သုံးနေရသည့်အတွက် ထုတ်သင့်ကြောင်း ပြောဆိုသည်။
“ဒါပေမယ့် တတိုင်းတပြည်လုံးက သာမန်ပြည်သူတွေအတွက် တကယ်လိုအပ်နေတဲ့ (၂ဝ၊ ၅ဝ၊ ၁ဝဝ) တန်တွေကို ပိုပြီးထုတ်သင့်တယ်။ အဲဒီငွေစက္ကူတွေမရှိလို့ အောက်ခြေပြည်သူ သန်းပေါင်းများစွာ အခက်အခဲတွေ ကြုံနေရတယ်။ ကုန်ဈေးနှုန်းတွေလည်း မြင့်တက်နေတယ်” ဟု အဆိုပါ စီးပွားရေးပညာရှင်က ပြောသည်။
ပြည်တွင်း၌ အမှန်တကယ် လိုနေသည့် ကျပ် (၂ဝ၊ ၅၀၊ ၁၀၀) တန်ငွေစက္ကူများကို ထုတ်ဝေပေးခြင်းမရှိဘဲ ယခုကဲ့သို့ တန်ဖိုးကြီး ငွေစက္ကူ ရိုက်ထုတ်ပေးခြင်းကို ရန်ကုန်မြို့မှ သာမန်ပြည်သူအများစုက ကြိုက်နှစ်သက်ခြင်းမရှိကြကြောင်း စုံစမ်းသိရှိရသည်။
“ဘာအတွက်ပဲဖြစ်ဖြစ် ကျပ် (၅,၀၀၀) တန် ထုတ်တဲ့အတွက် နောက်ဆက်တွဲဖြစ်လာမယ့် ပြဿနာတွေကတော့ အများကြီး ၀င်လာမှာပဲ။ လောလောဆယ်တော့ ဈေးနှုန်းတွေ တက်တယ်။ ဒါ ပထမဆုံး ပြည်သူတွေ ကြုံတွေ့ရတာပဲ” ဟု ရန်ကုန်မြို့ခံတဦးက ပြောသည်။
ခေတ်ပြိုင်မှကိုးကားသည်။
