မြ၀တီတွင် နေပြည်တော်မှ လူကုန်ကူးမှုတားဆီးရေး အထူးအဖွဲ့ ရောက်ရှိနေသောကြောင့် အမည်ထွက်သည့် မြန်မာလူကယ်ရီများ ထိုင်းဘက်သို့ တိမ်းရှောင်နေရသည်ဟု လူကယ်ရီတဦးက ပြောသည်။
၎င်းက “နေပြည်တော်က အထူးအဖွဲ့ မြ၀တီကို ရောက်နေတယ်။ ပြီးခဲ့တဲ့ တနင်္ဂနွေနေ့က (ကျော်ဇော) စာရင်းရှိတဲ့ လူကယ်ရီတွေကို ဖမ်းဖို့ဖြစ်တယ်။ အတော်များများကတော့ ရှောင်ကုန်ကြပြီ။ တချို့ ထိုင်းဘက်မှာ၊ တချို့ကတော့ အောက်ဆင်းသွားပြီး ရှောင်နေကြရတယ်။ နေပြည်တော်ကအမိန့်ဆိုတော့ ကျမတို့ပေးကမ်းထားတဲ့ မြ၀တီကအဖွဲ့တွေလည်း ဘာမှမတတ်နိုင်ဘူး။ အခြေအနေက မကောင်းတော့ အခုလို ထိုင်းဘက်လာရှောင်နေရတာ” ဟု ပြောသည်။
ပြီးခဲ့သည့် တနင်္ဂနွေနေ့မှ စတင်ဖမ်းဆီးမှုတွင် မြ၀တီရဲစခန်း၏ (ကျော်ဇော) စာရင်းဝင် လူကယ်ရီ (၂) ဦးနှင့် အခြားသံသယအဖြစ်ခံရသူ (၁၀) ဦးခန့်ကိုလည်း ဖမ်းဆီးထားသည်ဟု သိရသည်။
“တမြို့လုံးလိုက်ဖမ်းတာ၊ အမှတ် (၃) ရပ်ကွက်က အမျိုးသမီး (၂) ဦးပဲ မိတယ်။ တကယ့် လူကယ်ရီကြီးတွေကိုတော့ မမိဘူး။ ဘာလို့လဲဆိုတော့ မြ၀တီမှာ လူကယ်ရီလုပ်နေကြတဲ့ လူတွေဟာ မြ၀တီက အဖွဲ့စုံကို ပေးကမ်းညှိနှိုင်းပြီးမှ ဒီအလုပ်ကို လုပ်လို့ရတာ။ အခုလည်း မြ၀တီကရဲတွေက အသိပေးတာမြန်လို့၊ မဟုတ်ရင် ကျမတို့လည်း အဖမ်းခံရနိုင်တယ်” ဟု အဆိုပါ မြ၀တီမှ လူကယ်ရီဖြစ်သူက ပြောသည်။
လူကယ်ရီအဖွဲ့များသည် လစဉ် အချိုးကျနှုန်းဖြင့် မြ၀တီရှိ အာဏာပိုင်အဖွဲ့အစည်းပေါင်းစုံကို ပေးရသည့် ငွေပမာဏမှာ ကျပ်သိန်း (၁၀၀) နီးပါးခန့်ရှိပြီး အာဏာပိုင်အဖွဲ့အစည်းများက အလိုရှိ၍ မှာယူသည့် လူသုံးကုန်၊ စားသုံးကုန်နှင့် ရေခဲသေတ္တာ၊ ရုပ်မြင်သံကြားပြစက်များ၊ လေအေးပေးစက်များကိုလည်း လစဉ်နီးပါး ၀ယ်ပေးရသည်ဟု ၎င်းကပြောဆိုသည်။
တိမ်းရှောင်နေကြသည့် လူကယ်ရီလက်ကြီးသမားများကို မြ၀တီရဲစခန်းတွင် ဟန်ပြအနေဖြင့် လာရောက်အဖမ်းခံပေးရန် အာဏာပိုင်များဘက်က ပြောသော်လည်း လူကယ်ရီများက ယင်းအစီအစဉ်ကို လက်မခံဘဲ တိမ်းရှောင်နေကြခြင်းဖြစ်သည်ဟု သိရသည်။
မြ၀တီခရိုင်တွင် အခြေစိုက်၍ လှုပ်ရှားနေကြသည့် လူကယ်ရီများမှာ ထိုင်းနိုင်ငံတွင် အလုပ်အကိုင်ရှာဖွေရန် မြန်မာနိုင်ငံ ဒေသအသီးသီးမှ မြ၀တီနယ်စပ်သို့ ရောက်ရှိလာသူများကို ထိုင်းလူကယ်ရီများနှင့် ဆက်သွယ်၍ တဦးလျှင် မြန်မာငွေ (၅) သိန်းခွဲခန့်ရှိသည့် ထိုင်းဘတ်ငွေ (၁၅,၀၀၀) နှုန်းထားဖြင့် ဘန်ကောက်အပါအ၀င် ထိုင်းနိုင်ငံအတွင်းပိုင်းသို့ ပို့ဆောင်ပေးကြသူ များဖြစ်သည်။
မြ၀တီတွင် တာဝန်ကျသည့် လူဝင်မှုကြီးကြပ်ရေးဌာနမှ ၀န်ထမ်းတဦးက “ဒီထိုင်း-မြန်မာနယ်စပ် မြ၀တီ မဲဆောက်မှာဖြစ်နေတဲ့ လူကုန်ကူးမှုပြဿနာကို လက်ရှိအနေအထားအရ ထိုင်းဘက်ကဖြစ်စေ၊ မြန်မာဘက်ကဖြစ်စေ ဘယ်သူမှ ဖြေရှင်းနိုင်မှာ မဟုတ်ဘူး။ ထိုင်းဘက်သွားပြီး အလုပ်ရှာမယ့် မြန်မာတွေ နေ့တိုင်းပဲ မြ၀တီကနေသွားနေကြတာ တရက်ကို လူ (၂၀၀) ကျော်ရှိတယ်။ မြန်မာဘက်က သူတို့ကို သွားခွင့်ပြုသလို ထိုင်းဘက်ကလည်း ၀င်ခွင့်ပြုတယ်။ ပြဿနာက ဒါပဲ။ ထိုင်းနဲ့မြန်မာ လက်တွေ့မကျတဲ့ အလုပ်တွေ ဘယ်လိုပဲလုပ်လုပ် အလကားပဲ” ဟု ပြောသည်။
ယမန်နှစ် ဧပြီလလယ်တွင် ထိုင်းနှင့် မြန်မာ လူကုန်ကူးမှု ပူးပေါင်းတိုက်ဖျက်ရေး နားလည်မှု စာချွန်လွှာကို နှစ်နိုင်ငံ တာဝန်ရှိသူများက လက်မှတ်ရေးထိုးခဲ့ကြပြီး ယင်းလက်မှတ်ရေးထိုးပွဲသို့ မြန်မာဘက်မှ လူကုန်ကူးမှု တားဆီး ကာကွယ်ရေး ဗဟိုအဖွဲ့ ဥက္ကဋ္ဌ ပြည်ထဲရေး ၀န်ကြီးဌာန၀န်ကြီး ဗိုလ်ချုပ်မောင်ဦး တက်ရောက်ပြီး ထိုင်းနိုင်ငံဘက်မှ လူမှုဝန်ထမ်းနှင့် လူမှုဖွံ့ဖြိုးရေး ဝန်ကြီးဌာန ဝန်ကြီး နိုင်အစ်စလာစုံချိုင်းတို့ တက်ရောက်ခဲ့ကြသည်။
ရဲရင့် 
No comments:
Post a Comment